सडक दुर्घटनामा चार जनाको मृत्यु

काठमाडौं :  देशका विभिन्न स्थानमा भएका सवारी दुर्घटनामा चार जनाको मृत्यु भएको छ। बझाङमा जीप दुर्घटना हुँदा दुई जना, सुनसरीमा ट्रकको ठक्करबाट एक जना र कञ्चनपुरमा स्कुटरको ठक्करबाट एक जनाको मृत्यु भएको हो।

बझाङको केदारस्युँ गाउँपालिका-७ भानचौरमा बुधबार बिहान भानचौरबाट काँडाचौरतर्फ जाँदै गरेको जीप दुर्घटना हुँदा २७ वर्षीया पबिता धामी र ४० वर्षीय गोपाल धामीको घटनास्थलमै मृत्यु भएको प्रहरीले जनाएको छ। दुर्घटनामा घाइते भएका आठ जनाको विभिन्न अस्पतालमा उपचार भइरहेको छ। तीमध्ये तीन जनालाई थप उपचारका लागि डडेलधुरा रिफर गरिएको छ। जीप चालक प्रहरी नियन्त्रणमा छन्।

त्यस्तै, सुनसरीको इटहरीमा ट्रक र मोटरसाइकल ठोक्किँदा तेह्रथुमका अन्दाजी ३५ वर्षीय धनराज लिम्बुको मृत्यु भएको छ। गम्भीर घाइते उनको उपचारका क्रममा धरानस्थित बीपी कोइराला स्वास्थ्य विज्ञान प्रतिष्ठानमा मृत्यु भएको हो। ट्रक चालक फरार छन्।

कञ्चनपुरको बेदकोट नगरपालिका–१ हात्तीथलामा स्कुटरको ठक्करबाट ७० वर्षीया प्रमा देवी बोहराको मृत्यु भएको छ। उपचारका क्रममा महाकाली प्रादेशिक अस्पतालमा उनको मृत्यु भएको प्रहरीले जनाएको छ। स्कुटर चालकलाई प्रहरीले नियन्त्रणमा लिएको छ।