वाणिज्य बैंकको ब्याजदर झन् घट्यो

काठमाडौँ :  वाणिज्य बैंकहरूले भदौ महिनाका लागि नयाँ ब्याजदर सार्वजनिक गरेका छन्। साउनको तुलनामा औसत ब्याजदर फेरि घटेको छ ।

व्यक्तिगत मुद्दति निक्षेपमा बैंकहरूले साउनमा अधिकतम ५.६९ प्रतिशत दिने गरेका थिए भने भदौमा त्यो घटेर ५.५७ प्रतिशतमा पुगेको छ। संस्थागत मुद्दति निक्षेपमा पनि अधिकतम औसत ब्याजदर ४.११ प्रतिशतबाट घटेर ३.९६ प्रतिशतमा झरेको छ।

२० वाणिज्य बैंकमध्ये आठ बैंकले भदौका लागि व्यक्तिगत निक्षेपको अधिकतम ब्याजदर घटाएका छन् भने प्रभु बैंकले मात्र बढाएको छ। स्ट्याण्डर्ड चार्टर्ड बैंकले १.१३ प्रतिशतविन्दुले ब्याजदर घटाएर ५.१३ प्रतिशतमा ल्याएको छ। यता प्रभु बैंकले १.१ प्रतिशतविन्दुले बढाउँदै ५.३५ प्रतिशत पुर्याएको छ।

व्यक्तिगत मुद्दति निक्षेपमा एनआईसी एशिया बैंकले अधिकतम ६.२५ प्रतिशतका दरले सबैभन्दा बढी ब्याज दिने भएको छ भने लक्ष्मी सनराइज बैंकले अधिकतम ५ प्रतिशत मात्र दिनेछ। संस्थागत मुद्दति निक्षेपमा भने सात वाणिज्य बैंकले ब्याजदर घटाएका छन्। यस खालको निक्षेपमा औसत ब्याजदर ०.१५ प्रतिशतविन्दुले घटेको छ।