हिन्दू धर्मशास्त्रमा भगवान शिव र पार्वतीको सन्तानका रूपमा सामान्यतया दुई पुत्र-गणेश र कार्तिकेयको मात्र नाम लिइन्छ। तर पुराणका केही अध्याय र लोकविश्वासमा शिव-पार्वतीकी एक छोरी पनि भएको उल्लेख पाइन्छ । उनी हुन्- अशोकसुन्दरी, एक कमै सुनिने तर रोचक देवी।
कथाअनुसार, कैलास पर्वतमा पार्वती कहिलेकाहीँ एक्लो महसुस गर्थिन्। शिव समाधिमा लिन हुन्थे, गणेश र कार्तिकेय आफ्ना खेलकुद र दायित्वमा व्यस्त हुन्थे। त्यो बेला पार्वतीले आफ्ना मनका कुरा कल्पवृक्षसँग सुनाइन्। कल्पवृक्ष इच्छा पूरा गर्ने अद्भुत वृक्षको रुपमा चिनिन्छ । पार्वतीले भनिन्, “मलाई एक प्यारी छोरी चाहिएको छ, जसले मेरो साथ दिओस्।”
उनको त्यो इच्छा तत्कालै पूरा भयो। वृक्षबाट एक दिव्य कन्या प्रकट भइन्— अनुपम सुन्दरी, हसिलो मुहार र उज्यालो तेजले चम्किएकी। पार्वतीले नाम राखिन् अशोकसुन्दरी- जसको अर्थ हुन्छ “आमा पार्वतीलाई शोकमुक्त गर्ने सुन्दरी”।
बाल्यकालदेखि नै अशोकसुन्दरी आमा पार्वतीसँगै बसिन्, मातृवत्सला र दयालु स्वभावकी थिइन्। पछि नियतिले उनलाई राजा नहुषसँग बाँध्यो। अशोकसुन्दरीको विवाह राजा नहुषसँग भयो ।
पद्मपुराणका वर्णनअनुसार, नहुष भविष्यमा इन्द्रको स्थान लिने महान् राजा हुने थिए। अशोकसुन्दरी र नहुषको मिलनले उनको जीवनलाई नयाँ अध्यायमा पुर्यायो।
यद्यपि, अशोकसुन्दरीको कथा गणेश वा कार्तिकेयजस्तो प्रख्यात भएन। न त उनको व्यापक आराधना,साधना चलनमा आयो। तर विभिन्न क्षेत्रीय विश्वासमा उनीलाई कहिलेकाहीँ सन्तोषी माता वा अन्य देवीसँग पनि जोडिन्छ।
बाँकी कथा अर्को भागमा
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |