काठमाडौँ : नेपाली कांग्रेसका प्रमुख सचेतक निश्कल राईले चिया उद्योग र किसानका समस्या समाधानमा सरकार गम्भीर नदेखिएको आरोप लगाएका छन्।
बुधबार प्रतिनिधिसभाको बैठकमा बोल्दै उनले इलामसहित पूर्वी पहाडी जिल्लाका चिया किसान र उद्योगीहरू गम्भीर संकटमा परेको भए पनि सरकारले आवश्यक पहल नगरेको बताए। सामाजिक सञ्जालमा प्रधानमन्त्री चिया पसलमा पुगेर चिया पिएको देखिए पनि चिया क्षेत्रका वास्तविक समस्या समाधानमा ध्यान नदिएको उनको टिप्पणी थियो।
राईले भारतीय चिया बोर्डले लागू गरेको नयाँ ‘स्ट्यान्डर्ड अपरेटिङ प्रोसिड्योर’ ९एसओपी० का कारण नेपाली चिया निर्यात प्रभावित भएको बताए। गुणस्तर परीक्षण प्रतिवेदन आउन लामो समय लाग्ने, प्रतिवेदन नआएसम्म चिया बिक्री गर्न नपाइने तथा सामान्य त्रुटि देखिए पनि उत्पादित चिया नष्ट गर्नुपर्ने व्यवस्थाले उद्योगीहरू मारमा परेको उनको भनाइ थियो।
उद्योग सञ्चालन प्रभावित हुँदा किसानले उत्पादन गरेको हरियो चिया खेर गएको, श्रमिकको रोजगारी संकटमा परेको र उद्योगीहरू बैंक ऋणको ब्याजसमेत तिर्न नसक्ने अवस्थामा पुगेको भन्दै उनले सरकारले तत्काल कूटनीतिक तथा नीतिगत पहल गर्न माग गरे।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |