काठमाडौँ : ऊर्जा सहकार्य, सम्पर्क सञ्जाल विस्तार र भारतीय लगानी प्रवर्द्धनको मुख्य एजेन्डासहित प्रधानमन्त्री वालेन्द्र शाह आज दिउँसो १ः४५ बजे भारतको दुईदिने राजकीय भ्रमणका लागि नयाँ दिल्ली प्रस्थान गर्दै छन् । प्रधानमन्त्री पद सम्हालेपछिको उनको यो पहिलो विदेश भ्रमण हो ।
भारतीय समकक्षी नरेन्द्र मोदीको निमन्त्रणामा दिल्ली जान लागेका प्रधानमन्त्री शाहले भ्रमणका क्रममा व्यापार, पारवहन, पूर्वाधार तथा आर्थिक साझेदारीका विषयमा उच्चस्तरीय वार्ता गर्नेछन् । सोमबार हैदराबाद हाउसमा हुने द्विपक्षीय भेटवार्तापछि दुई देशबीच सम्पन्न विभिन्न ऊर्जा तथा कनेक्टिभिटी परियोजनाको उद्घाटन, नयाँको शिलान्यास र शिक्षा, स्वास्थ्य, कृषि एवं विपद् व्यवस्थापनसम्बन्धी समझदारीपत्रमा हस्ताक्षर हुनेछ ।
आज साँझ भारतीय विदेशमन्त्री एस। जयशङ्करसँग शिष्टाचार भेट गर्ने शाहले भोलि राष्ट्रपति द्रौपदी मुर्मुसँग भेटवार्ता गर्नेछन् । यस्तै, नेपाल–भारत बिजनेस फोरममार्फत उनले भारतीय व्यवसायीलाई नेपालमा लगानीका लागि आह्वान गर्नेछन् ।
अर्थमन्त्री डा.स्वर्णिम वाग्ले, परराष्ट्रमन्त्री शिशिर खनालसहितको उच्चस्तरीय प्रतिनिधिमण्डलको नेतृत्व गर्दै जान लागेका प्रधानमन्त्री शाह भोलि साँझ स्वदेश फर्कने कार्यतालिका छ ।

हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |