काठमाडौँ : नेकपा एमालेका उपमहासचिव योगेश भट्टराईले आफ्नो पार्टीको तत्काल सरकार बदल्ने वा सरकारमा जाने कुनै सोच र एजेन्डा नभएको स्पष्ट पारेका छन्।
पार्टी कार्यालय च्यासलमा सञ्चारकर्मीहरूसँग कुरा गर्दै भट्टराईले वर्तमान राष्ट्रिय स्वतन्त्र पार्टी (रास्वपा) नेतृत्वको सरकारसँग प्रचण्ड बहुमत रहेकाले संसदीय बाटोबाट सरकार फेरबदल हुने सम्भावना नरहेको बताए। सत्ता पक्षभित्रै आन्तरिक द्वन्द्व सिर्जना भएर विकल्प खोजिए त्यो उनीहरूकै आन्तरिक विषय हुने उल्लेख गर्दै उनले एमाले त्यसमा संलग्न नहुने धारणा राखे।
उपमहासचिव भट्टराईका अनुसार विगत सात-आठ महिनामा सरकारका कामकारबाहीप्रति जनतामा क्रमशः आक्रोश बढ्दै गएको छ। सरकारले गलत क्रियाकलाप जारी राखे जनस्तरबाट प्रतिवाद भई सडकबाटै सरकार बदलिन सक्ने विगतको नजिर औँल्याउँदै उनले एमाले भने त्यस्तो दुर्भाग्यपूर्ण बाटोमा नहिँड्ने दाबी गरे।
पार्टीले आगामी स्थानीय र प्रदेशसभा निर्वाचनलाई केन्द्रित गरी राष्ट्रिय भेला आयोजना गर्न लागेको उनले जानकारी दिए। उक्त भेलाले सरकारका जनविरोधी कामका विरुद्ध ठोस धारणा बनाउँदै रचनात्मक दबाब सिर्जना गर्ने भट्टराईको भनाइ छ।

हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |