तेहरानमा इजरायली आक्रमणपछि इरानको चेतावनी– ‘इतिहासकै ठूलो जवाफ आउँछ’

काठमाडौँ : इजरायलले इरानको राजधानी तेहरानस्थित राष्ट्रिय प्रसारण सेवाको भवनमा हवाई आक्रमण गरेपछि इरानले इतिहासकै सबैभन्दा ठूलो प्रतिआक्रमणको चेतावनी दिएको छ।

आक्रमणमा एक सरकारी टिभीकर्मीको मृत्यु भएको छ भने प्रसारण भइरहेकै बेला मिसाइल प्रहार भएको भिडियो सार्वजनिक भएको छ। इरानले इजरायली च्यानल १२ र १४ का मुख्यालय खाली गर्न चेतावनी दिँदै सैन्य संयमता अन्त्य हुने संकेत दिएको छ। सोमबार राति इरानले इजरायली भूमिमा मिसाइल प्रहार गरिसकेको अन्तर्राष्ट्रिय सञ्चार माध्यमले जनाएका छन्। यसबीच नातान्ज क्षेत्रमा इरानी सेनाको सक्रियता बढेको उल्लेख छ।

संयुक्त राष्ट्रसंघका लागि इरानी दूत अमिर सायद इरभानीले आत्मरक्षाको अधिकार प्रयोग भइरहेको बताएका छन्। यता, इजरायली प्रधानमन्त्री नेतन्याहूले आफूहरू विजयको बाटोमा रहेको दाबी गरेका छन्।

क्यानडामा चलिरहेको जी–सेभेन सम्मेलनमा अमेरिकी राष्ट्रपति डोनाल्ड ट्रम्पले इजरायलको समर्थन गर्दै इरानलाई वार्ताका लागि आउन र तेहरानस्थित अमेरिकी नागरिकलाई देश छाड्न आग्रह गरेका छन्। तर उनले जी–सेभेनको संयुक्त वक्तव्यमा हस्ताक्षर गर्न अस्वीकार गरेका छन्।

इरानको भनाइमा, इजरायली आक्रमणमा हालसम्म २२४ जनाको मृत्यु भएको छ भने इजरायली पक्षका अनुसार इरानको जवाफी कारबाहीमा २४ जनाको ज्यान गएको छ।