मुस्ताङ : उपल्लो मुस्ताङको लोमान्थाङ क्षेत्रमा मंगलबार साँझ आएको भीषण लेदोसहितको बाढीले ६ वटा पुलमा क्षति पुर्याएको छ।
नेपाल–चीन सीमावर्ती लोमान्थाङ गाउँपालिका–४ छोसेरस्थित चुम्जुङ खोलामा करिब तीन घण्टा लगातार बाढी आएपछि क्षति भएको हो । बाढीले चुम्जुङ खोलाको एक पक्की मोटरेबल पुल र साम्जुङस्थित निर्माणाधीन अर्को पक्की पुललाई क्षति पुर्याएको जिल्ला प्रहरी कार्यालय मुस्ताङले जनाएको छ। त्यस्तै, बाढीले सो क्षेत्रका तीन वटा काठेपुल र एक फलामे झोलुङ्गे पुल बगाएको छ।
बाढीले खोलाको बीचमा रहेको एक होटल र नजिकैको न्याम्डो गाउँका दुई घर जोखिममा परेपछि स्थानीयलाई सुरक्षित स्थानमा सारिएको प्रहरीको भनाइ छ । मानवीय तथा पशु चौपायामा भने क्षतिसम्म क्षतिको विवरण नआएको बताइएको छ ।
बाढीपछिको जोखिमलाई ध्यानमा राख्दै इलाका प्रहरी कार्यालय छोसेर र सशस्त्र प्रहरी बल नेचुङबाट संयुक्त टोली परिचालन गरिएको छ। जिल्ला प्रहरी कार्यालयले बाढीको बहाव घट्दो अवस्थामा रहे पनि जोखिम कायम रहेकाले सतर्क रहन स्थानीयवासीलाई आग्रह गरेको छ।
