काठमाडौं : आइसिसी महिला टी–२० विश्वकप एसिया छनोट अन्तर्गत नेपालले मंगलबार हङकङसँग महत्वपूर्ण खेल खेल्दैछ । बैंककस्थित टेर्डथाई क्रिकेट मैदानमा नेपाली समय अनुसार दिउँसो २ बजेतिर हुने खेलमा नेपाल जितको खोजीमा छ ।
नेपाल र हङकङबीच अहिलेसम्म ९ खेल भएका छन्। तीमध्ये ५ खेलमा नेपाल विजयी भएको छ भने बाँकी ४ खेल हङकङले आफ्नो पक्षमा पार्न सफल भएको छ। यस वर्ष युगान्डामा सम्पन्न चार देशीय सिरिजमा पहिलो खेलमा नेपाल हङकङसँग २ विकेटले पराजित भएको थियो। तर दोस्रो खेलमा ६ विकेटको सानदार जित निकाल्दै नेपालले प्रभावशाली पुनरागमन गरेको थियो। नेपाल त्यसै लयलाई कायम राख्दै सुपर ३ मा स्थान सुरक्षित गर्ने लक्ष्यमा छ।
अंक तालिकामा नेपाल शीर्ष स्थानमा
नेपाल हालसम्मको प्रदर्शनमा समूहको शीर्ष स्थानमा छ। समूह चरणको पहिलो खेल हङकङसँग वर्षाका कारण रद्द भएको थियो। दोस्रो खेलमा भने नेपालले बहराइनलाई ९ विकेटले हराउँदै सानदार सुरुआत गरेको थियो। अर्कोतर्फ हङकङले अहिलेसम्म आफ्नो दुवै खेलमा अंक बाँडेको छ। उसको बहराइनसँगको खेलसमेत वर्षाका कारण रद्द भएको थियो।
जितेमा सुपर ३, हारेमा सपना चकनाचुर
मंगलबारको खेल नेपालका लागि अति महत्वपूर्ण हुनेछ। यो खेलमा नेपालले जित निकालेमा एक खेल बाँकी रहँदै सुपर ३ मा स्थान पक्का गर्नेछ। तर पराजित भए नेपालका लागि सुपर ३ पुग्ने संभावना लगभग समाप्त हुने छ। त्यसैले नेपालका लागि जित बाहेक कुनै विकल्प छैन।
नेपालकी कप्तान रुबिना क्षेत्रीको नेतृत्वमा बलिङ र ब्याटिङमा राम्रो प्रदर्शन गर्दै आएको नेपाल टोली हङकङविरुद्ध आफ्नो अघिल्लो अनुभवलाई सदुपयोग गर्दै मैदान उत्रिनेछ।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |