काठमाडौं : यमनको राजधानी सानामा गत हप्ता भएको इजरायली हवाई आक्रमणमा हुथी विद्रोही समूहका स्वघोषित प्रधानमन्त्री अहमद गालेब नासेर अल रहावी मारिएको समूहले पुष्टि गरेको छ।
इरान समर्थित हुथीहरूले बिहीबार इजरायल डिफेन्स फोर्सेज (आईडीएफ) ले गरेको आक्रमणमा रहावीसहित अन्य वरिष्ठ मन्त्रीहरू पनि मारिएको दाबी गरेका छन्। बीबीसीका अनुसार आईडीएफले सानामा भएको एक भेलालाई लक्षित गर्दै रहावी “खत्म” भएको जनाएको छ। तर मारिएका सबैको नाम भने सार्वजनिक गरिएको छैन।
साउदी अरेबियाको अल हदाथ ले विदेशमन्त्रीसहित न्याय, श्रम, सामाजिक मामिला तथा खेलकुद मन्त्री मारिएको उल्लेख गरेको छ। हुथी राष्ट्रपति महदी अल(मशातको कार्यालयले केही मन्त्री गम्भीर घाइते भएको जनाएको छ। रहावीको मृत्युपछि उपप्रधानमन्त्री मुहम्मद अहमद मिफ्ताहलाई कार्यवाहक प्रधानमन्त्री तोकिएको छ।
सन् २०१४ यता उत्तर–पश्चिमी यमनमा नियन्त्रण जमाउँदै आएको हुथी समूहले हालैका वर्षहरूमा इजरायलविरुद्ध मिसाइल आक्रमण तीव्र पारेको छ।
