काठमाडौँ : बेलायत,फ्रान्स, जर्मनी र इटलीले अमेरिका र इरानबीच हुन गइरहेको शान्ति सम्झौताको स्वागत गर्दै त्यसलाई क्षेत्रीय स्थिरता र विश्व अर्थतन्त्रका लागि महत्वपूर्ण अवसरका रूपमा व्याख्या गरेका छन्। ई–४ समूहका नामले चिनिने यी चार देशका नेताहरूले संयुक्त वक्तव्य जारी गर्दै सम्झौताको पूर्ण र शीघ्र कार्यान्वयनका लागि सबै पक्षलाई आग्रह गरेका हुन्।
संयुक्त वक्तव्यमा अमेरिका, इरान तथा वार्तामा संलग्न पाकिस्तान, कतारलगायत मध्यस्थकर्ताहरूलाई कूटनीतिक सफलताका लागि बधाई दिइएको छ। नेताहरूले मध्यपूर्वमा दीर्घकालीन शान्ति र स्थिरता कायम गर्न सम्झौताले सकारात्मक भूमिका खेल्ने विश्वास व्यक्त गरेका छन्।
उनीहरूले अमेरिका, इरान र क्षेत्रीय साझेदारहरूसँग सहकार्य गर्दै उपलब्ध अवसरको अधिकतम उपयोग गर्न प्रतिबद्ध रहेको जनाएका छन्। साथै, विश्व व्यापारका लागि महत्वपूर्ण मानिने होर्मुज जलडमरूमध्य तत्काल खुला गरी कुनै पनि शर्त वा अवरोधबिना जलयातायातको स्वतन्त्र आवागमन सुनिश्चित गर्नुपर्नेमा जोड दिएका छन्।
वक्तव्यमा लेबनानको स्थिरता, सार्वभौमसत्ता र भौगोलिक अखण्डताप्रति आफ्नो समर्थन कायम रहेको पनि पुनः दोहोर्याइएको छ। युरोपेली नेताहरूले सम्झौताको प्रभावकारी कार्यान्वयनले क्षेत्रीय तनाव कम गर्न तथा विश्व अर्थतन्त्रमा देखिएको अनिश्चितता घटाउन सहयोग पुग्ने अपेक्षा व्यक्त गरेका छन्।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |