उपभोक्ता अदालतको निर्णय विरुद्ध देशभरका स्वास्थ्य संस्थामा आकस्मिकबाहेकका सेवा बन्द

काठमाडौं :  उपभोक्ता अदालतले चिकित्सकमाथि गरेको कारबाहीको निर्णयप्रति विरोध जनाउँदै नेपाल चिकित्सक सङ्घले सोमबार देशभरका स्वास्थ्य संस्थामा आकस्मिकबाहेकका सम्पूर्ण सेवा बन्द गरेको छ।

अस्पतालहरूमा नियमित जाँच, शल्यक्रिया, ओपीडी लगायतका सेवा बन्द हुँदा हजारौं बिरामी मर्कामा परेका छन्। उपभोक्ता अदालतले हालै ग्रान्डी अस्पताल, हिमाल अस्पताल र ओम अस्पतालसहितका चिकित्सकमाथि करोडौं रुपैयाँ क्षतिपूर्ति भराउने निर्णय गरेपछि चिकित्सक समुदाय आक्रोशित बनेको हो।

संघले चिकित्सा पेशालाई वैज्ञानिक, संवेदनशील र नैतिक सेवा भएको भन्दै त्यसको मूल्याङ्कन मेडिकल काउन्सिलबाट हुनुपर्ने तर्क गरेको छ । संघले अदालतको फैसला पुनरावलोकन गर्न आग्रह गर्दै, यथाशीघ्र समाधान नभए सशक्त आन्दोलनमा उत्रने चेतावनी दिएको छ ।