सप्तरी : सप्तरीको सप्तकोशी नगरपालिकास्थित फत्तेपुरमा बढ्दो सडक दुर्घटना न्यूनीकरण र सडक सुरक्षालाई मध्यनजर गर्दै स्थानीय जेन्जी ग्रुप सप्तकोशीले स्थानीय ट्राफिक प्रहरीको सहकार्यमा एक प्रशंसनीय अभियान सम्पन्न गरेको छ।
रोजगारी र अध्ययनका लागि विदेशमा रहेका साथीभाइहरूबाट करिब ५० हजार रुपैयाँ आर्थिक सहयोग संकलन गरी स्थानीय युवाहरूको आफ्नै प्रत्यक्ष श्रमदानबाट बजारका विभिन्न संवेदनशील क्षेत्रहरूमा ८ वटा जेब्रा क्रसिङ निर्माण गरिएको छ भने ४ वटा नो पार्किङु र ३ वटा गति सीमित सूचक बोर्डहरू समेत बनाएर सडकका मुख्य स्थानहरूमा जडान गरिएको छ। जेन्जीका अगुवा सुयोग ढुंगानाका अनुसार सडक सुरक्षा जस्तो संवेदनशील विषयमा नागरिक स्तरबाटै सचेतना जगाउन यो कदम चालिएको हो भने यस समूहले विगतदेखि नै सामूहिक सरसफाइ र सार्वजनिक निकायहरूमा हुने ढिलासुस्ती एवं अनियमितता विरुद्ध निरन्तर खबरदारी गर्दै आएको छ।
सरकारी बजेटको प्रतीक्षा नगरी युवाहरू आफैं जुटेर सडकमा रङरोगन गर्नेदेखि ट्राफिक चिह्नहरू ठड्याउनेसम्मका कार्यहरूले स्थानीय स्तरमा सकारात्मक दबाब सृजना गरेको छ। अगुवा ढुंगानाले स्थानीय सरकारले युवाहरूको यस्तो सक्रियता र सिर्जनशीलतामा सहकार्यको हात अघि बढाएमा आगामी दिनमा पनि निस्शुल्क श्रमदानमार्फत नगरको समग्र विकास, पूर्वाधार संरक्षण र सुशासन कायम गर्ने कार्यमा सदैव सहयोग गर्न युवा टोली तत्पर रहेको प्रतिबद्धता समेत व्यक्त गर्नुभएको छ।
यस अभियानले सीमित स्रोत र साधनका बाबजुद पनि सामूहिक एकता र इच्छाशक्ति भएमा समाजमा प्रत्यक्ष परिवर्तन ल्याउन सकिन्छ भन्ने उत्कृष्ट उदाहरण पेश गरेको छ।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |