बडादसैँमा काठमाडौँ उपत्यका छाड्नेको लाम

काठमाडौँ : चाडपर्वमा परिवारसँग भेटघाट गर्ने हुटहुटीले काठमाडौँ छाड्नेहरूको सङ्ख्या तीव्र रूपमा बढे पनि बिग्रिएका सडकका कारण यात्रुहरू सास्ती खेप्न बाध्य भएका छन्। बडादसैँ नजिकिएसँगै अध्ययन र रोजगारीका क्रममा उपत्यकामा बस्दै आएका सर्वसाधारण गाउँ फर्किने क्रम सुरु भएपछि कलङ्की, नयाँ बसपार्क, जडीबुटी लगायतका नाकामा यात्रुको बाक्लो घुइँचो लागेको छ।

ट्राफिक प्रहरीका अनुसार पछिल्लो २४ घण्टामा मात्रै उपत्यकाका विभिन्‍न आठवटा नाका हुँदै ५६ हजार ८०९ जना यात्रु काठमाडौँबाट बाहिरिएका छन्। जसमा नागढुङ्गाबाट २७ हजार ६४९ र भक्तपुर नाकाबाट २० हजार ६१५ यात्रुले उपत्यका छाडेका हुन्।

विभिन्न राष्ट्रिय राजमार्गहरू बिग्रिएका कारण काठमाडौँ आउने सवारीसाधन समयमै आइपुग्न नसक्दा यात्रु व्यवस्थापनमा ठूलो चुनौती थपिएको यातायात व्यवसायी राष्ट्रिय महासङ्घका महासचिव डेकनाथ गौतमले बताए। महासङ्घले ठगीबाट बच्न अनिवार्य रूपमा आधिकारिक काउन्टरबाट टिकट काटेर मात्र यात्रा गर्न र तोकिएको भाडादर बुझ्न यात्रुहरूलाई अपिल गरेको छ।