दुई दिन भारी वर्षाको चेतावनी, सतर्कता अपनाउन आग्रह

काठमाडौँ :  देशभर सक्रिय मनसुनका कारण आगामी दुई दिन कोशी, बागमती, गण्डकी र मधेश प्रदेशका विभिन्न क्षेत्रमा भारीदेखि अति भारी वर्षाको सम्भावना रहेको भन्दै जल तथा मौसम पूर्वानुमान महाशाखाले सतर्कता अपनाउन आग्रह गरेको छ।

महाशाखाका अनुसार मनसुनको न्यूनचापीय रेखा पश्चिममा औसत स्थानभन्दा माथि र पूर्वमा नेपालको तराई नजिक रहेकाले देशभर सामान्यदेखि पूर्ण बदली भएको छ। अहिले कोशी, बागमती, गण्डकी, लुम्बिनी, कर्णाली तथा सुदूरपश्चिमका केही स्थानमा वर्षा भइरहेको छ।

आज र आज राति पहाडी तथा तराईका विभिन्न क्षेत्रमा मेघगर्जन, चट्याङसहित वर्षा हुने तथा कोशी, बागमती र गण्डकीका केही स्थानमा भारीदेखि धेरै भारी वर्षा हुने सम्भावना छ। आइतबार र सोमबार ती प्रदेशका पहाडी क्षेत्रमा अति भारी वर्षा हुन सक्ने महाशाखाले जनाएको छ।

महाशाखाले बाढी, पहिरो, गेग्रान बहाव र भूक्षयको जोखिम बढ्न सक्ने भन्दै नदी किनार र जोखिमयुक्त क्षेत्रमा विशेष सावधानी अपनाउन तथा मौसमसम्बन्धी सूचना नियमित रूपमा पछ्याउन आग्रह गरेको छ।