काठमाडौँ : राष्ट्रिय मानवअधिकार आयोगले सुनसरीको देवानगञ्जमा भएको हिंसात्मक घटनाको निष्पक्ष अनुसन्धान गरी दोषीलाई कानुनी कारबाहीको दायरामा ल्याउन सरकारलाई निर्देशन दिएको छ।
आयोगले मृतकका परिवारलाई राहत र क्षतिपूर्ति उपलब्ध गराउन तथा घाइतेहरूको निःशुल्क र प्रभावकारी उपचार सुनिश्चित गर्न पनि आग्रह गरेको छ। आयोगले जारी गरेको विज्ञप्तिअनुसार घटनाबारे कोशी प्रदेश कार्यालय, विराटनगरमार्फत प्रारम्भिक अनुगमन भइरहेको छ। पोलमा झण्डा राख्ने विषयमा सुरु भएको विवाद डिजे बजाउने क्रममा चर्किएपछि दुई समुदायबीच झडप भएको र स्थिति नियन्त्रणमा लिन प्रहरीले गोली चलाउँदा ओमप्रकाश मेहताको मृत्यु भएको जनाएको छ।
घटनामा ९ जना घाइते भएका छन्, जसमध्ये दुई जनाको अवस्था गम्भीर छ। आयोगले सुनसरीको शान्तिसुरक्षा अवस्था सुदृढ बनाउन र वार्ता तथा संवादमार्फत सामाजिक सद्भाव कायम राख्न सरकार, राजनीतिक दल, नागरिक समाज, मानवअधिकारकर्मी र सर्वसाधारणलाई सहयोग गर्न आह्वान गरेको छ।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |