काठमाडौं : नाइजेरियाको उत्तरपूर्वी बोर्नो राज्यमा भएको आक्रमणमा कम्तीमा ५५ जनाको मृत्यु भएको छ। विस्थापित भई लामो समयपछि फर्किएको दारुल जामा गाउँमा शुक्रबार राति बोको हरामका लडाकुहरूले गोली चलाउँदै घरमा आगजनी गर्दा ठूलो जनधनको क्षति भएको हो।
सरकारी समर्थित मिलिसियाका कमाण्डर बाबागाना इब्राहिमका अनुसार मारिनेमा छ सैनिकसमेत छन्। गाउँ प्रमुखले भने शनिबार बिहानसम्म ७० शव भेटिएको र अझै धेरै बेपत्ता रहेको बताए। आक्रमणमा २० भन्दा बढी घर र १० बस नष्ट भएका छन्।
स्थानीयका अनुसार सेना आक्रमणअघि नै सचेत गरिए पनि थप बल पठाइएको थिएन। मारिएका धेरैजना यसअघि बामा नगरको विस्थापित शिविरमा रहेका थिए, जसलाई सरकारले बन्द गरी गाउँ फर्काएको थियो।
सन् २००९ देखि सक्रिय बोको हराम र त्यसबाट छुट्टिएको आईएसडब्ल्युएपी समूहका गतिविधिबाट हालसम्म ४० हजारभन्दा बढीको मृत्यु र २० लाखभन्दा बढी विस्थापित भएका छन्।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |