काठमाडौँ : मुलुकका विभिन्न भागमा आएको बिनाशकारी बाढीका कारण हालसम्म १ हजार १ सय १४ जनाको मृत्यु पुष्टि भएको छ। गृह मन्त्रालयअन्तर्गतको राष्ट्रिय विपद् जोखिम न्यूनीकरण तथा व्यवस्थापन प्राधिकरणका अनुसार सबैभन्दा धेरै चितवनमा ३४८, नवलपरासी पूर्वमा २१७, नवलपरासी पश्चिममा १९० र नुवाकोटमा १५५ जनाको शव फेला परेको छ।
त्यस्तै तनहुँ, धादिङ, गोरखा र रसुवामा गरी थप १६४ जनाको ज्यान गएको छ। फेला परेका शवमध्ये हालसम्म ९५ जनाको मात्र सनाखत भएको छ भने ३ हजार ९ सय १६ जना अझै सम्पर्कविहीन छन्।
विपद्पछि २१ हजारभन्दा बढी सुरक्षाकर्मी परिचालन गरी हालसम्म ११ हजार ९ सय ९३ जनाको सफल उद्धार गरिएको छ। नेपाली सेनाको हेलिकप्टरमार्फत ४ हजार ९१ नेपाली र २७३ विदेशी नागरिकलाई सुरक्षित स्थानमा ल्याइएको छ।
प्रभावित ३ हजार ४ सय ५३ जनालाई होल्डिङ सेन्टरमा राखिएको छ। सरकारले उद्धार तथा राहतका लागि रसुवा र नुवाकोटलाई १–१ करोड, धादिङलाई ५० लाख र अन्य १५ पालिकाका लागि ६ करोड ७५ लाख रुपैयाँ निकासा गरेको छ।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |