काठमाडौँ : कञ्चनपुरको शुक्लाफाँटा राष्ट्रिय निकुञ्जमा च्याउ टिप्न गएका र सम्पर्कविहीन बनेका सबै महिला सकुशल भेटिएका छन्। आइतबारदेखि हराइरहेका दुई समूहका महिला सोमबारसम्म परिवारको सम्पर्कमा आएपछि खोजी अभियान टुंगिएको हो।
भीमदत्त नगरपालिका–१९ बागफाँटाका महिलाहरू परिवारको सम्पर्कमा आएको रणसिंह दल गणका गणपति प्रमुख सेनानी प्रकाश घिमिरेले जानकारी दिए। उनका अनुसार नेपाली सेना र अन्य सुरक्षा निकायले निकुञ्जभित्र व्यापक खोजी अभियान सञ्चालन गरिरहेका बेला उनीहरू सुरक्षित रहेको सूचना प्राप्त भएको हो।
यसअघि आइतबार साँझदेखि हराइरहेका बेल्डाडी गाउँपालिका-२ का तीन महिलालाई सहसेनानी सुमन जिसी नेतृत्वको सेनाको टोलीले सोमबार बिहान सकुशल उद्धार गरेको थियो। उद्धार गरिएका सबै महिलालाई परिवारको जिम्मा लगाइएको सेनाले जनाएको छ।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |