चितवन : इच्छाकामना गाउँपालिका-५ सिमलधारामा सुक्खा पहिरो खसेर रातभर अवरुद्ध भएको मुग्लिन-काठमाडौं सडकखण्ड ८ घण्टापछि दुईतर्फी सञ्चालनमा आएको छ।
शनिबार राति करिब साढे १० बजे सडकमाथिबाट रुखसहितको सुक्खा पहिरो खसेपछि राजमार्ग पूर्ण रूपमा बन्द भएको थियो। पहिरो पन्छाउन ५ वटा उपकरण प्रयोग गरिएको र निरन्तरको प्रयासपछि आइतबार बिहान सवा ६ बजेबाट सडक पूर्ण रूपमा खुलाइएको जिल्ला प्रहरी कार्यालय चितवनले जनाएको छ।
पहिरो पन्छाएर आवागमन सुचारु गरिए पनि लामो समय सडक बन्द हुँदा राजमार्गका विभिन्न स्थानमा सवारीसाधनको लामो लाम र जाम भने अझै कायमै छ। रोकिएका सवारीसाधनलाई गन्तव्यतर्फ पठाउने काम भइरहेकाले ट्राफिक व्यवस्थापन सामान्य अवस्थामा फर्किन भने अझै केही समय लाग्नेछ।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |