छठ पर्वको मुख्य दिन आज : साँझ अस्ताउँदो सूर्यलाई अर्घ्य दिइँदै

काठमाडौँ :  प्रकृतिप्रतिको श्रद्धा, उपासना र सूर्यदेवको आराधनाको महापर्व छठ आज साँझ अस्ताउँदो सूर्यलाई पूजा आराधना गरी अर्घ्य दिएसँगै हर्षोल्लासपूर्वक मनाइँदैछ ।

कार्तिक शुक्ल चतुर्थीदेखि सप्तमीसम्म विधिपूर्वक मनाइने यस पर्वको मुख्य दिन आज साँझ बर्तालुहरू नदी, पोखरी तथा जलाशय किनारमा भेला भई अस्ताउँदो सूर्यलाई पहिलो अर्घ्य अर्पण गर्नेछन् । महाभारतकालमा पाण्डवहरूले गुप्तवास सफल पार्न सूर्यदेवको आराधना गरेको पौराणिक ग्रन्थमा उल्लेख छ भने अत्रिमुनिकी पत्नी अनुसूयाले अटल सौभाग्य प्राप्त गर्न यो व्रत सुरु गरेको जनविश्वास रहिआएको छ ।

भौतिक अस्तित्व र चिकित्सा विज्ञानसँग समेत जोडिएको यस पर्वमा चर्मरोग निवारण हुने तथा परिवारको सुख, समृद्धि र सन्तानको कल्याण हुने धार्मिक मान्यता छ । पहिलो दिन चोखोखाएर र दोस्रो दिन खरनाको विधि पूरा गरेका बर्तालुहरू आज कठोर निराहार व्रत बसी रातभर जाग्राम बस्नेछन् ।

विसं २०४६ पछि राष्ट्रिय स्वरूप ग्रहण गरेको छठ पर्व हाल काठमाडौँ उपत्यकाका गुह्येश्वरी, गौरीघाट, कमलपोखरी, बागमती, नख्खु र विष्णुमती किनारलगायत देशभरका जलाशयहरूमा भव्य रूपमा मनाइन्छ । कार्तिक शुक्ल सप्तमीका दिन भोलिपल्ट बिहान उदाउँदो सूर्यलाई अर्घ्य दिएपछि चार दिन लामो यो कठिन व्रत विधिवत् रूपमा सम्पन्न हुनेछ।