काठमाडौं : पूर्वप्रधानमन्त्री एवं नेपाली कम्युनिस्ट पार्टीका संयोजक पुष्पकमल दाहाल प्रचण्ड पाँचदिने रुस भ्रमणमा निस्किएका छन्। विश्व राजनीतिमा राष्ट्रहरूको स्वतन्त्रता र सार्वभौमिकतासम्बन्धी बहसमा सहभागी हुन उनी शुक्रबार मस्को प्रस्थान गरेका हुन्।
प्रचण्डसँग उनका प्रमुख स्वकीय सचिव गोविन्दप्रसाद आचार्य पनि रुस गएका छन्। मस्कोमा नोभेम्बर १४ देखि १७ सम्म आयोजना हुने ‘राष्ट्रहरूको स्वतन्त्रताका लागि’ शीर्षकको विश्व सम्मेलनमा उनले सहभागिता जनाउनेछन्।
अखिल रुसी राजनीतिक दलको आयोजनामा हुने सम्मेलनमा विश्वभरका कम्युनिस्ट नेताहरू सहभागी हुने बताइएको छ। शक्तिशाली राष्ट्रले कमजोर तथा विकासशील मुलुकमाथि आर्थिक, राजनीतिक र रणनीतिक प्रभाव विस्तार गर्ने प्रवृत्तिको विरोध गर्नु सम्मेलनको मुख्य उद्देश्य रहेको छ।
प्रचण्डले रुस भ्रमणका क्रममा सम्मेलनमा सहभागितासँगै आवश्यक भेटघाटसमेत गर्ने उनका स्वकीय सचिव केशव रावलले जानकारी दिए। पाँच दिन रुसमा बिताएर प्रचण्ड नोभेम्बर १९ मा स्वदेश फर्किने कार्यक्रम छ।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |