काठमाडौं : ‘एआईको युगमा नेपाल’ अभियानका संयोजक सौरभराज पन्तले नेपाल प्रहरीको वर्तमान संकटलाई व्यक्ति विशेषमाथि लागेका आरोपमा मात्र सीमित नराखी संस्थागत सुधार, जवाफदेहिता र राष्ट्रिय सुरक्षाको बृहत् दृष्टिकोणबाट हेर्नुपर्ने बताएका छन्।
जेनजी आन्दोलनदेखि प्रहरी महानिरीक्षक (आईजीपी) दानबहादुर कार्कीमाथि लागेका आरोप तथा नेपाल प्रहरीको पछिल्लो प्रेस विज्ञप्तिसम्मका घटनाक्रमले प्रहरीको संस्थागत विश्वसनीयता, व्यावसायिकता र राज्यका सुरक्षा निकायको भूमिकाबारे गम्भीर बहस आवश्यक बनाएको उनको धारणा छ।
संयोजक पन्तले पछिल्लो समय चरणबद्ध रूपमा राज्यका विभिन्न संस्थाहरूमाथि प्रहार भइरहेको उल्लेख गर्दै यसलाई छुट्टाछुट्टै घटनाका रूपमा मात्र हेर्न नहुने बताए। राज्यका संस्थाहरूको विश्वसनीयता, मनोबल र कार्यक्षमता कमजोर हुँदै जाँदा अन्ततः राज्य नै असफल हुने रणनीतिक जोखिम निम्तन सक्ने चेतावनी दिँदै उनले कुनै पनि घटनाको सतही व्याख्या नगरी त्यसको व्यापक सन्दर्भ बुझ्नुपर्नेमा जोड दिए।
प्रहरी राज्यको पहिलो सुरक्षा पंक्तिका रूपमा रहेको उल्लेख गर्दै उनले संस्थाभित्रका कमजोरी, अनियमितता वा अधिकार दुरुपयोगमाथि निष्पक्ष छानबिन गरी कानुनअनुसार कारबाही हुनुपर्ने स्पष्ट पारे। तर, केही व्यक्तिका गल्तीका आधारमा समग्र संस्थालाई नै दोषी ठहर गर्ने वा त्यसको व्यावसायिक क्षमतामाथि प्रश्न उठाउनु उचित नहुने उनको भनाइ छ।
‘हाम्रो उद्देश्य दोषीलाई संरक्षण गर्नु होइन, दोषीलाई कानुनी दायरामा ल्याउँदै संस्थागत सुधार गर्नु हो,’ पन्तले भने, ‘नेपाल प्रहरीलाई अझ सक्षम, जवाफदेही र विश्वसनीय बनाउनु आजको आवश्यकता हो।’
आफ्नो अभियानको मूल उद्देश्य देशको दीर्घकालीन हितका लागि बृहत् राष्ट्रिय सहमति निर्माण गर्नु रहेको बताउँदै उनले नेपालको भौगोलिक संवेदनशीलता, बदलिँदो अन्तर्राष्ट्रिय परिवेश र कृत्रिम बुद्धिमत्ता (एआई) ले ल्याइरहेको परिवर्तनलाई बुझेर राजनीतिक दल, राज्यका निकाय, युवा पुस्ता र नागरिक समाजबीच साझा संवाद हुनुपर्ने बताए।
नेपालको वर्तमान अवस्था जटिल र संवेदनशील रहेको बताउँदै पन्तले प्रहरी संगठनका सदस्यलाई जवाफदेही बनाउने प्रक्रिया र राष्ट्रिय सुरक्षाबीच सन्तुलन कायम गर्नुपर्नेमा जोड दिए। संस्थाभित्रका कमजोरी सच्याउँदा समग्र सुरक्षा प्रणालीको क्षमता र संस्थागत मनोबलमा पर्न सक्ने असर ध्यान दिनुपर्ने भन्दै उनले प्रहरीको मनोबल उच्च राख्नु नै राष्ट्रिय सुरक्षाको हितमा हुने बताए।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |